"მანქანა ამოტრიალებული იყო... კარები გავაღე და ჩემმა ბიჭმა მეზობლის ბიჭი მომაწოდა, თვითონ კი დინებამ გაიტაცა" - რა ჰყვება კავთისხევში, მდინარის მიერ გატაცებული ახალგაზრდის მამა
კასპის მუნიციპალიტეტში მომხდარი უბედური შემთხვევის შედეგად ერთი ახალგაზრდა გარდაიცვალა, ერთს კი ეძებენ. შემთხვევა სოფელ კავთისხევის სიახლოვეს მოხდა.
AMBEBI.GE-ს ინფორმაციით, 30 წლამდე ასაკის სამი ახალგაზრდა "ნისანის" მარკის მაღალი გამავლობის ავტომობილით მდინარე კავთურას კალაპოტში შევიდა, რა დროსაც ადიდებულმა მდინარემ მანქანა გაიტაცა.
ავტომობილში მყოფთაგან ერთმა გამოსვლა შეძლო, ერთი მათგანი გარდაცვლილი იპოვეს, მესამეს კი შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველები ეძებენ.
დინების შედეგად გატაცებული მამაკაცის მამის თქმით, მან სამიდან ერთის ამოყვანა შეძლო, ხოლო მისი შვილი ძლიერმა დინებამ გაიტაცა.
"ხმაურზე რომ გავიქეცი, მანქანა უკვე ამოტრიალებული იყო, წყალი გადადიოდა ზევიდან. კარები გააღეთო, ჩემი ბიჭი იძახდა, მარტო ცხვირი უჩანდა, გავაღე როგორღაც კარი და მეზობლის ბიჭი მომაწოდა. ვიდრე მოვტრიალდებოდი მანქანის სახელურზე ხელი ჰქონდა მოკიდებული. მოვტრიალდი თუ არა, ხელი აღარ ეკიდა. დინებამ გაიტაცა." - აცხადებს მამაკაცი "მთავარ არხთან".
ასევე იხილეთ: